Benedicte Rydland Hareide er aktuell med si tredje diktsamling, «Det ville graset». Den erfarne læraren og poeten frå Alta hentar inspirasjon frå både Nord-Noreg og Vestlandet i sine nye dikt.

− Eg er fødd i Tromsø, men har budd mange stader. Vestlandet ligg mitt hjarte nært, fortel Hareide. Ho har røter på Stord og Hareid, og budde i Stryn og Molde i oppveksten. No er ho busett i Alta med mann og to vaksne born.

I mange år underviste Hareide i norsk, historie, filosofi og religion ved Alta vidaregåande skole. No nyttar ho tida til å skrive.

− Det er mi hovudinteresse, sjølv om eg òg speler piano og prøver å lære meg å måle, seier ho.

«Det ville graset» inneheld dikt om alt frå kjærleik og tap til krig og frykt. Naturen spelar ei viktig rolle i mange av dikta.

− Dei fleste har ei handling eller utvikling, men kan òg skildre ei stemning, forklarar Hareide.

Ho skriv på nynorsk, sjølv om ho snakkar meir bokmål til dagleg.

− Nynorsken ligg meg nærast når eg skriv dikt, seier ho.

Hareide hentar inspirasjon frå mange kjelder.

− Det kan vere noko eg ser på tur, ein replikk frå ein film, eller glimt frå nyheitene.

Ho legg til at mange av dikta er baserte på eigne opplevingar.

Med «Det ville graset» vonar Hareide å nå lesarar frå vidaregåande alder og oppover.

− Ein må vere litt vaksen for å få meir ut av dikta, meiner ho.

Hareide er allereie i gang med nye prosjekt, inkludert humoristiske noveller. Men det er lyrikken som ligg henne nærast:

− Eg er i gang med å notere strøtankar som eg vonar vil bli til ei ny diktbok etter kvart.

For meir informasjon om boka, klikk her!