Marthe Haugerud debuterte med «Skogstrådar» i 2020. I år blei denne diktsamlinga også utgitt som lydbok, og lyttarane får her høre både lyrikk og tonar. Ei av dei som har latt seg begeistre, er Kristine Søgnen, som har anmeldt lydboka.

Søgnen har dette å seie om lydbokversjonen av «Skogstrådar»:

– Det er Siw Laurent Myrvold som les alle tekstane som samlinga til Marthe rommar, og mellom tekstane finst pausar der Siw inviterar lyttarane inn i tonar som gjer at ein som lyttar blir minna på det fantastiske instrumentet ei stemme kan vere, og i mangel på ord på kva det er Siw gjer i desse mellomromma skriv eg at ho nynnar, sullar, byssar med innhald som når meg som lyttar heilt inn, ja, utan at eg heilt kan kan kle i skriftspråk kva dette innhaldet er, men det kommuniserer så vakkert, ja, nær på saumlaust med tekstane til Marthe, fordi stemma er den same uavhengig av om det er tonar eller ord som kjem or munnen.

– For ei gåve, tenkjer eg, det er å få kledd orda sine i ei slik stemme, Siw er så nær i tekstane, ho les utan distanse, med slik age for tekstane til Marthe, ja, for eit samarbeid mellom dei to, det er som å vere med på ei reise utover og innover i både ytre og indre landskap, og der ein som lyttar aldri er i tvil om at det tekstane fortel ber sanninga i seg, for dei finst ikkje tilgjorde, og dei teiknar heilt konkrete bilete i hovudet mitt- eit sanseleg landskap der eit eg rører seg i fortid og notid, men også ser føre seg ei mogeleg framtid. Eg opplever å være tilstade, ei lita stund i den store tida, medan årstidene skiftar under stjernene, månen og sola på den grøne og blå kloden. Og der opplever eg å vere i det veldige spennet mellom liv og død med tilhøyrande krefter.